རིགས་པ་དྲུག་ཅུ་པའི་ཚིག་ལེའུར་བྱས་པ་ཞེས་བྱ་བ།
YS
ACIP
D 3825
96
TSA 20b1-22b6
གང་གིས་སྐྱེ་དང་འཇིག་པ་དག །
ཚུལ་འདི་ཡིས་ནི་སྤངས་གྱུར་པ། །
རྟེན་ཅིང་འབྱུང་བ་གསུངས་པ་ཡི། །
ཐུབ་དབང་དེ་ལ་ཕྱག་འཚལ་ལོ། ༎ Homage ༎
གང་གིས་བློ་གྲོས་ཡོད་མེད་ལས། །
རྣམ་པར་འདས་ཤིང་མི་གནས་པ། །
དེ་དག་གིས་ནི་རྐྱེན་གྱི་དོན། །
ཟབ་མོ་དམིགས་མེད་རྣམ་པར་རྟོགས། ༎ 1 ༎
རེ་ཞིག་ཉེས་ཀུན་འབྱུང་བའི་གནས། །
མེད་ཉིད་རྣམ་པར་བཟློག་ཟིན་གྱིས། ༎ 2ab ༎
རིགས་པའི་གང་གིས་ཡོད་ཉིད་དང་། །
བཟློག་པར་འགྱུར་བ་མཉན་པར་གྱིས། ༎ 2cd ༎
ཇི་ལྟར་བྱིས་པས་རྣམ་བརྟགས་བཞིན། །
དངོས་པོ་གལ་ཏེ་བདེན་འགྱུར་ན། །
དེ་དངོས་མེད་པས་རྣམ་ཐར་དུ། །
གང་གིས་མི་འདོད་རྒྱུ་ཅི་ཞིག ༎ 3 ༎
ཡོད་པས་རྣམ་པར་མི་གྲོལ་ཏེ། །
མེད་པས་སྲིད་པ་འདི་ལས་མིན། ༎ 4ab ༎
དངོས་དང་དངོས་མེད་ཡོངས་ཤེས་པས། །
བདག་ཉིད་ཆེན་པོ་རྣམ་པར་གྲོལ། ༎ 4cd ༎
དེ་ཉིད་མ་མཐོང་འཇིག་རྟེན་དང་། །
མྱ་ངན་འདས་པར་རློམ་སེམས་ཏེ། ༎ 5ab ༎
དེ་ཉིད་གཟིགས་རྣམས་འཇིག་རྟེན་དང་། །
མྱ་ངན་འདས་པར་རློམ་སེམས་མེད། ༎ 5cd ༎
སྲིད་པ་དང་ནི་མྱ་ངན་འདས། །
གཉིས་པོ་འདི་ནི་ཡོད་མ་ཡིན། ༎ 6ab ༎
སྲིད་པ་ཡོངས་སུ་ཤེས་པ་ཉིད། །
མྱ་ངན་འདས་ཤེས་བྱ་བར་བརྗོད། ༎ 6cd ༎
དངོས་པོ་བྱུང་བ་ཞིག་པ་ལ། །
ཇི་ལྟར་འགོག་པར་བརྟགས་པ་བཞིན། །
དེ་བཞིན་དམ་པ་རྣམས་ཀྱིས་ཀྱང་། །
སྒྱུ་མ་བྱས་ལྟའི་འགོག་པ་བཞེད། ༎ 7 ༎
རྣམ་པར་འཇིག་པས་འགོག་འགྱུར་གྱི། །
འདུས་བྱས་ཡོངས་སུ་ཤེས་པས་མིན། །
དེ་ནི་སུ་ལ་མངོན་སུམ་འགྱུར། །
ཞིག་ཤེས་པ་དེར་ཇི་ལྟར་འགྱུར། ༎ 8 ༎
གལ་ཏེ་ཕུང་པོ་མ་འགགས་ན། །
ཉོན་མོངས་ཟད་ཀྱང་འདས་མི་འགྱུར། ༎ 9ab ༎
གང་ཚེ་འདིར་ནི་འགགས་གྱུར་པ། །
དེ་ཡི་ཚེ་ན་གྲོལ་བར་འགྱུར། ༎ 9cd ༎
མ་རིག་རྐྱེན་གྱིས་བྱུང་བ་ལ། །
ཡང་དག་ཡེ་ཤེས་ཀྱིས་གཟིགས་ན། །
སྐྱེ་བ་དང་ནི་འགགས་པའང་རུང་། །
འགའ་ཡང་དམིགས་པར་མི་འགྱུར་རོ། ༎ 10 ༎
དེ་ཉིད་མཐོང་ཆོས་མྱ་ངན་ལས། །
འདས་ཤིང་བྱ་བ་བྱས་པའང་ཡིན། ༎ 11ab ༎
གལ་ཏེ་ཆོས་ཤེས་མཇུག་ཐོགས་སུ། །
འདི་ལ་བྱེ་བྲག་ཡོད་ན་ནི། ༎ 11cd ༎
དངོས་པོ་ཤིན་ཏུ་ཕྲ་བ་ལའང་། །
གང་«sde» 21a.1 གིས་སྐྱེ་བར་རྣམ་བརྟགས་པ། །
རྣམ་པར་མི་མཁས་དེ་ཡི་ནི། །
རྐྱེན་ལས་བྱུང་བའི་དོན་མ་མཐོང་། ༎ 12 ༎
ཉོན་མོངས་ཟད་པའི་དགེ་སློང་གི། །
གལ་ཏེ་འཁོར་བ་རྣམ་ལྡོག་ན། །
ཅི་ཕྱིར་རྫོགས་སངས་རྒྱས་རྣམས་ཀྱིས། །
དེ་ཡི་རྩོམ་པ་རྣམ་མི་བཤད། ༎ 13 ༎
རྩོམ་པ་ཡོད་ན་ངེས་པར་ཡང་། །
ལྟ་བར་འགྱུར་བ་ཡོངས་སུ་འཛིན། ༎ 14ab ༎
རྟེན་ཅིང་འབྲེལ་པར་འབྱུང་བ་གང་། །
དེ་ལ་སྔོན་དང་ཐ་མ་ཅི། ༎ 14cd ༎
སྔོན་སྐྱེས་པ་ནི་ཇི་ལྟར་ན། །
ཕྱི་ནས་སླར་ཡང་བཟློག་པར་འགྱུར། ༎ 15ab ༎
སྔོན་དང་ཕྱི་མའི་མཐའ་བྲལ་བ། །
འགྲོ་བ་སྒྱུ་མ་བཞིན་དུ་སྣང་། ༎ 15cd ༎
གང་ཚེ་སྒྱུ་མ་འབྱུང་ཞེ་འམ། །
གང་ཚེ་འཇིག་པར་འགྱུར་སྙམ་དུ། །
སྒྱུ་མ་ཤེས་པ་དེར་མི་རྨོངས། །
སྒྱུ་མ་མི་ཤེས་ཡོངས་སུ་སྲེད། ༎ 16 ༎
སྲིད་པ་སྨིག་རྒྱུ་སྒྱུ་འདྲ་བར། །
བློ་ཡིས་མཐོང་བར་གྱུར་པ་ནི། །
སྔོན་གྱི་མཐའ་འམ་ཕྱི་མའི་མཐའ། །
ལྟ་བས་ཡོངས་སུ་སླད་མི་འགྱུར། ༎ 17 ༎
གང་དག་གིས་ནི་འདུས་བྱས་ལ། །
སྐྱེ་དང་འཇིག་པ་རྣམ་བརྟགས་པ། །
དེ་དག་རྟེན་འབྱུང་འཁོར་ལོ་ཡིས། །
འཁོར་ལོའི་འགྲོ་བ་རྣམ་མི་རྟོག ༎ 18 ༎
དེ་དང་དེ་བརྟེན་གང་འབྱུང་དེ། །
རང་གི་དངོས་པོར་སྐྱེས་མ་ཡིན། །
རང་གི་དངོས་པོ་གང་མ་སྐྱེས། །
དེ་ནི་སྐྱེ་ཞེས་ཇི་ལྟར་བྱ། ༎ 19 ༎
རྒྱུ་ཟད་ཉིད་ལས་ཞི་བ་ནི། །
ཟད་ཅེས་བྱ་བར་རྟོག་པ་སྟེ། །
རང་བཞིན་གྱིས་ནི་གང་མ་ཟད། །
དེ་ལ་ཟད་ཅེས་ཇི་ལྟར་བརྗོད། ༎ 20 ༎
དེ་ལྟར་ཅི་ཡང་སྐྱེ་བ་མེད། །
ཅི་ཡང་འགག་པར་མི་འགྱུར་རོ། ༎ 21ab ༎
སྐྱེ་བ་དང་ནི་འཇིག་པའི་ལམ། །
དགོས་པའི་དོན་དུ་བསྟན་པའོ། ༎ 21cd ༎
སྐྱེ་བ་ཤེས་པས་འཇིག་པ་ཤེས། །འཇིག་པ་ཤེས་པས་མི་རྟག་ཤེས། །མི་རྟག་ཉིད་ལ་འཇུག་ཤེས་པས། །དམ་པའི་ཆོས་ཀྱང་རྟོག་པར་འགྱུར། ༎ 22 ༎
གང་དག་རྟེན་ཅིང་འབྲེལ་འབྱུང་བ། །སྐྱེ་དང་འཇིག་པ་རྣམ་སྤངས་པར། །ཤེས་པར་གྱུར་པ་དེ་དག་ནི། །ལྟར་གྱུར་སྲིད་པའི་རྒྱ་མཚོ་བརྒལ། ༎ 23 ༎
སོ་སོའི་སྐྱེ་བོ་དངོས་བདག་ཅན། །ཡོད་དང་མེད་པར་ཕྱིན་ཅི་ལོག །ཉེས་པས་ཉོན་མོངས་དབང་གྱུར་རྣམས། །རང་གི་སེམས་ཀྱིས་བསླུས་པར་འགྱུར། ༎ 24 ༎
དངོས་ལ་མཁས་པ་རྣམས་ཀྱིས་ནི། །དངོས་པོ་མི་རྟག་བསླུ་བའི་ཆོས། །གསོག་དང་སྟོང་པ་བདག་མེད་པ། །རྣམ་པར་དབེན་ཞེས་བྱ་བར་མཐོང་། ༎ 25 ༎
གནས་མེད་དམིགས་པ་ཡོད་མ་ཡིན། །རྩ་བ་མེད་ཅིང་གནས་པ་མེད། །མ་རིག་རྒྱུ་«ཅོ་» 21b.1 ལས་ཤིན་དུ་བྱུང་«སྡེ་» 21b.1 །ཐོག་མ་དབུས་མཐའ་རྣམ་པར་སྤངས། ༎ 26 ༎ཆུ་ཤིང་བཞིན་དུ་སྙིང་པོ་མེད། །དྲི་ཟའི་གྲོང་ཁྱེར་འདྲ་བ་སྟེ། །རྨོངས་པའི་གྲོང་ཁྱེར་མི་བཟད་«སྣར་» 21b.1 པའི། །འགྲོ་བ་སྒྱུ་མ་བཞིན་དུ་སྣང་། ༎ 27 ༎
ཚངས་སོགས་འཇིག་རྟེན་འདི་ལ་ནི། །བདེན་པར་རབ་ཏུ་གང་སྣང་བ། །དེ་ནི་འཕགས་ལ་བརྫུན་ཞེས་གསུངས། །འདི་ལས་གཞན་ལྟ་ཅི་ཞིག་ལུས། ༎ 28 ༎
འཇིག་རྟེན་མ་རིག་ལྡོངས་གྱུར་པ། །སྲེད་པ་རྒྱུན་གྱིས་རྗེས་འབྲང་དང་། །མཁས་པ་སྲེད་པ་དང་བྲལ་བ། །དགེ་བ་རྣམས་ལྟ་ག་ལ་མཉམ། ༎ 29 ༎
དེ་ཉིད་ཚོལ་ལ་ཐོག་མར་ནི། །ཐམས་ཅད་ཡོད་ཅེས་བརྗོད་པར་བྱ། །དོན་རྣམས་རྟོགས་ཤིང་ཆགས་མེད་ལ། «པེ་» 24a.1 །ཕྱིས་ནི་རྣམ་པར་དབེན་པའོ། ༎ 30 ༎
རྣམ་པར་དབེན་དོན་མི་ཤེས་ལ། །ཐོས་པ་ཙམ་ལ་འཇུག་བྱེད་ཅིང་། །གང་དག་བསོད་ནམས་མི་བྱེད་པ། །སྐྱེས་བུ་ཐ་ཤལ་དེ་དག་བརླག ༎ 31 ༎
ལས་རྣམས་འབྲས་བུ་བཅས་ཉིད་དང་། །འགྲོ་བ་དག་ཀྱང་ཡང་དག་བཤད། །དེ་ཡི་རང་བཞིན་ཡོངས་ཤེས་དང་། །སྐྱེ་བ་མེད་པ་དག་ཀྱང་བསྟན། ༎ 32 ༎
དགོངས་པའི་དབང་གིས་རྒྱལ་བ་རྣམས། །ང་དང་ང་ཡི་ཞེས་གསུངས་ལྟར། །ཕུང་པོ་ཁམས་དང་སྐྱེ་མཆེད་རྣམས། །དེ་བཞིན་དགོས་པའི་དབང་གིས་གསུངས། ༎ 33 ༎
འབྱུང་བ་ཆེ་ལ་སོགས་བཤད་པ། །རྣམ་པར་ཤེས་སུ་ཡང་དག་འདུ། །དེ་ཤེས་པས་ནི་འབྲལ་འགྱུར་ན། །ལོག་པར་རྣམ་བརྟགས་མ་ཡིན་ནམ། ༎ 34 ༎
མྱ་ངན་འདས་པ་བདེན་གཅིག་པུར། །རྒྱལ་བ་རྣམས་ཀྱིས་གང་གསུངས་པ། །དེ་ཚེ་ལྷག་མ་ལོག་མིན་ཞེས། །མཁས་པ་སུ་ཞིག་རྟོག་པར་བྱེད། ༎ 35 ༎
ཇི་སྲིད་ཡིད་ཀྱི་རྣམ་གཡོ་བ། །དེ་སྲིད་བདུད་ཀྱི་སྤྱོད་ཡུལ་དེ། །དེ་ལྟ་ཡིན་ན་འདི་ལ་ནི། །ཉེས་པ་མེད་པར་ཅིས་མི་འཐད། ༎ 36 ༎
འཇིག་རྟེན་མ་རིག་རྐྱེན་ཅན་དུ། །གང་ཕྱིར་སངས་རྒྱས་རྣམས་གསུངས་པ། །འདི་ཡི་ཕྱིར་ན་འཇིག་རྟེན་འདི། །རྣམ་རྟོག་ཡིན་ཞེས་ཅིས་མི་འཐད། ༎ 37 ༎
མ་རིག་འགགས་པར་གྱུར་པ་ན། །གང་ཞིག་འགག་པར་འགྱུར་བ་དེ། །མི་ཤེས་པ་ལས་ཀུན་བརྟགས་པར། །ཇི་ལྟ་བུར་ན་གསལ་མི་འགྱུར། ༎ 38 ༎
གང་ཞིག་རྒྱུ་དང་བཅས་འབྱུང་ཞིང་། །རྐྱེན་མེད་པར་ནི་གནས་པ་མེད། །རྐྱེན་མེད་ཕྱིར་ཡང་འཇིག་འགྱུར་བ། །དེ་ནི་ཡོད་ཅེས་ཇི་ལྟར་རྟོགས། ༎ 39 ༎
གལ་ཏེ་ཡོད་པར་སྨྲ་བ་རྣམས།« སྡེ་» 22a.1 །དངོས་མཆོག་ཞེན་ནས་གནས་པ་ནི། །ལམ་དེ་ཉིད་ལ་གནས་པ་སྟེ། །དེ་ལ་ངོ་མཚར་ཅུང་ཟད་མེད། ༎ 40 ༎
སངས་རྒྱས་ལམ་ལ་བརྟེན་ནས་ནི། །ཀུན་ལ་མི་རྟག་སྨྲ་བ་རྣམས། །རྩོད་པས་དངོས་རྣམས་མཆོག་བཟུང་བས། །གནས་པ་གང་ཡིན་དེ་རྨད་དོ། ༎ 41 ༎
འདི་འམ་དེའོ་ཞེས་« པེ་» 24b.1 གང་དུ། །རྣམ་པར་« སྣར་» 22a.1 དཔྱད་ནས་མི་དམིགས་ན། །རྩོད་པ་འདིའམ་དེ་བདེན་ཞེས། །མཁས་པ་སུ་ཞིག་སྨྲ་བར་འགྱུར། ༎ 42 ༎
གང་དག་གིས་ནི་མ་བརྟེན་པར། །བདག་གམ་འཇིག་རྟེན་མངོན་ཞེན་པ། །དེ་དག་ཀྱེ་མ་རྟག་མི་རྟག །ལ་སོགས་ལྟ་བས་འཕྲོགས་པ་ཡིན། ༎ 43 ༎
གང་དག་བརྟེན་ནས་དངོས་པོ་རྣམས། །དེ་ཉིད་དུ་ནི་གྲུབ་འདོད་པ། །དེ་དག་ལ་ཡང་རྟག་སོགས་སྐྱོན། །དེ་དག་ཇི་ལྟར་འབྱུང་མི་འགྱུར། ༎ 44 ༎
གང་དག་བརྟེན་ནས་དངོས་པོ་རྣམས། །ཆུ་ཡི་ཟླ་བ་ལྟ་བུར་ནི། །ཡང་དག་མ་ཡིན་ལོག་མིན་པར། །འདོད་པ་དེ་དག་ལྟས་མི་འཕྲོགས། ༎ 45 ༎
དངོས་པོར་ཁས་ལེན་ཡོད་ན་ནི། །འདོད་ཆགས་ཞེ་སྡང་འབྱུང་བ་ཡི། །ལྟ་བ་མི་བཟད་མ་རུངས་འབྱུང་། །དེ་ལས་བྱུང་བའི་སྤྱོད་པར་འགྱུར། ༎ 46 ༎
དེ་ནི་ལྟ་བ་ཀུན་གྱི་རྒྱུ། །དེ་མེད་ཉོན་མོངས་མི་སྐྱེ་སྟེ། །དེ་ཕྱིར་དེ་ནི་ཡོངས་ཤེས་ན། །ལྟ་དང་ཉོན་མོངས་ཡོངས་སུ་འབྱང་། ༎ 47 ༎
དངོས་པོར་ཁས་ལེན་ཡོད་ན་ནི། །གང་གིས་དེ་ཤེས་འགྱུར་སྙམ་ན། །བརྟེན་ནས་འབྱུང་བ་མཐོང་བ་དེ། །བརྟེན་ནས་སྐྱེ་བ་མ་སྐྱེས་པས། །དེ་ཉིད་མཁྱེན་པ་མཆོག་གིས་གསུངས། ༎ 48 ༎
ལོག་པའི་ཤེས་པ་ཟིལ་གནོན་པ། །བདེན་པ་མིན་ལ་བདེན་རྫུན་པའི། །ཡོངས་སུ་འཛིན་དང་རྩོད་སྩོགས་ཀྱི། །རིམ་པ་ཆགས་ལས་འབྱུང་བར་འགྱུར། ༎ 49 ༎
ཆེ་བའི་བདག་ཉིད་ཅན་དེ་དག །རྣམས་ལ་ཕྱོགས་མེད་རྩོད་པ་མེད། །གང་རྣམས་ལ་ནི་ཕྱོགས་མེད་པ། །དེ་ལ་གཞན་ཕྱོགས་ག་ལ་ཡོད། ༎ 50 ༎
གང་ཡང་རུང་བའི་གནས་རྙེད་ནས། །ཉོན་མོངས་སྦྲུལ་གདུག་གཡོ་ཅན་གྱིས། །ཟིན་པར་འགྱུར་ཏེ་གང་གི་སེམས། །གནས་མེད་དེ་དག་ཟིན་མི་འགྱུར། ༎ 51 ༎
གནས་བཅས་སེམས་དང་ལྡན་རྣམས་ལ། །ཉོན་མོངས་དུག་ཆེན་ཅིས་མི་འགྱུར། ༎ 52ab ༎
གང་ཚེ་བར་མ་འདུག་པ་ཡང་། །ཉོན་མོངས་སྦྲུལ་གྱིས་ཟིན་པར་འགྱུར། ༎ 52 cd ༎བྱིས་པ་བདེན་པར་འདུ་ཤེས་པས། །གཟུགས་བརྙན་ལ་ནི་ཆགས་པ་བཞིན།« ཅོ་» 22b.1 །དེ་ལྟར་འཇིག་རྟེན་རྨོངས་« སྡེ་» 22b.1 པའི་ཕྱིར། །ཡུལ་གྱི་གཟེབ་ལ་ཐོགས་པར་འགྱུར། ༎ 53 ༎
བདག་ཉིད་« པེ་» 25a.1 ཆེ་རྣམས་དངོས་པོ་དག །གཟུགས་བརྙན་ལྟ་བུར་ཡེ་ཤེས་ཀྱི། །མིག་གིས་མཐོང་ནས་ཡུལ་ཞེས་ནི། །བྱ་བའི་འདམ་ལ་མི་ཐོགས་སོ། ༎ 54 ༎
བྱིས་པ་རྣམས་ནི་གཟུགས་ལ་ཆགས། །བར་མ་དག་ནི་ཆགས་བྲལ་འགྱུར། །གཟུགས་ཀྱི་རང་བཞིན་ཤེས་པ་ཡི། །བློ་མཆོག་ལྡན་པ་རྣམ་པར་གྲོལ། ༎ 55 ༎
སྡུག་སྙམ་པ་ལས་ཆགས་པར་འགྱུར།« སྣར་» 22b.1 །དེ་ལས་བཟློག་པས་འདོད་ཆགས་བྲལ། །སྒྱུ་མའི་སྐྱེས་བུ་ལྟར་དབེན་པར། །མཐོང་ནས་མྱ་ངན་འདའ་བར་འགྱུར། ༎ 56 ༎
ལོག་པའི་ཤེས་པས་མངོན་གདུང་བའི། །ཉོན་མོངས་སྐྱོན་རྣམས་གང་ཡིན་དེ། །དངོས་དང་དངོས་མེད་རྣམ་རྟོག་པ། །དོན་ཤེས་འགྱུར་ལ་མི་འབྱུང་ངོ་། ༎ 57 ༎
གནས་ཡོད་ན་ནི་འདོད་ཆགས་དང་། །འདོད་ཆགས་བྲལ་བར་འགྱུར་ཞིག་ན། །གནས་མེད་བདག་ཉིད་ཆེན་པོ་རྣམས། །ཆགས་པ་མེད་ཅིང་ཆགས་བྲལ་མིན། ༎ 58 ༎
གང་དག་རྣམ་པར་དབེན་སྙམ་དུ། །གཡོ་བའི་ཡིད་ཀྱང་མི་གཡོ་བ། །ཉོན་མོངས་སྦྲུལ་གྱིས་དཀྲུགས་གྱུར་པ། །མི་ཟད་སྲིད་པའི་རྒྱ་མཚོ་བརྒལ། ༎ 59 ༎