Ras ine ras jumat. Ras samfur di suru seser di suru ro paik oktober
tahun syaran di suru seser di fyak oras ri war arwo babo. Ro fyoru
yafafyar baime yakofen badir manggun aya snori. Isoine binsar B Mofu
ro mnu Nyampun sup Byaki bar wamurem. Yamarisen kaku yakfafyaru fafyar
beba bero sup Papua ine. Fafyar ine byeknam kaku ro mnu Sopen ro sup
Byaki bar Wambarek. Isoine fafyar beba Mananarmak'rdi. Snon bero mnu
Sopen ya snori Yawi Nusyado. Yawi Nusyado dom yaf ya ro urek bero mnu
Sopen bande ya bori. Dom yaf anya ra ibro, ifrom i ma ikun i ra imnai
kyer i kuker japan, ifen ma bakdi. Ro fyor rokaker na nasur kwar Yawi
Nusyado ifrur ayar ya fa idwarek u yaf i insama randip sya san awer
rokaker na. Yawi Nusyado imarisen kaku snar myam u japan, ifen ma
bakdi byanna nasur pyum. Fyoro ba Yawi Nusyado myam randip ya dan yaf
byani. Yawi Nusyado imbran syewar yar u ayar ya fama myam pak robaido
wongkir o ryo ayar ya ba. Ras-ras randip anya dan ker yaf i isof Yawi
Nusyado fyafayaf kaku mura kyara fa ibe isin u randip ya fa myun i. Ro
rob ya Yawi Nusyado dun u makbak byedi erobaido bom byedi ma rya isin
randip anya ro yaf andiri. Ro rob ri fandu Yawi Nusyado ryower u
randip anya byerakrok ro yaf ya dori. Yawi Nusyado fyaku randip anya
ro ayar andir i isof u myam pduk kaku i insape syo makbak byanya
robaido bom byani ra kyur ro randip ani. Bape ro fyor u makbak byanya
kyur ro randip anya Yawi Nusyado ikandor kaku snar u ryower randip
anya dar ba boi dawos be snonkaku, dobe: “Yamnai”. Meser ya ido Yawi
Nusyado rya syewar randip anya weur byena insama iyau user i fama myam
randip weur no ba boi weur snonkaku monda erobaido weur snonkaku
nairi. Yawi Nusyado iso monda weur snonkaku ma rik porm anna isof
imbran srow u abyab oser. Yawi Nusyado myam nyan ya isya ipdef ra
abyab ya dori, mura kyara fa ibe iso pdef mundum be abyab ya dori. Ro
fyor imbran u ew ri suru kyor mundum Yawi Nusyado imnaf mnggarm ya
ifuken i bo dobe: "Au ido mansei is au, wabe rwa beryo ma rosai swewar
i? Erobaido swewar ya?" Yawi Nusyado imnai ma dores ma ryower u
mnggarm anya ikofen wer bo dobe: "Wabe wun u makbak bani erobaido wabe
wun bom banya, imboi ro fyor u kwaber ya wasusu kuker dokor bedi,
insape wabur." Ro diya Yawi Nusyado dakfuken bo dobe: "Yafawi na mob
yambran ra ya ba." Mnggarm anya ikofen wer bo dobe, "Waso ma wafrur
monda ro yakofen kwar faro au, robaido na rwosdis ma wasapi." Ro diya
Yawi Nusyado iso ma ifrur ro mnggarm ya ikofen na. Ro fyor anya Yawi
Nusyado imnaf u snonkaku sya sibor u siwor, simbrif ma sibras befasnai
u sisya siryab naba kaku. Mnggarm anya ifuken wer, "Wamnaf u mnggarm
naiwa ma rwower babir na ke?" Yawi Nusyado kyarem bo dobe, "Yamnaf u
warwor ma baras befo kuker u raryab." Ro fyor ya Yawi Nusyado mnggamor
byesya sbase ma myam u mnu beba ya isren ma ipyum kaku ryo barpon
byedi. Myam kako kawasa bero mnu ya smam be bebabo kaem. Yawi Nusyado
myam babir kako mansar binsar bemar fyoro kwar sya sisya kako, bape
smam be bebabo kako. Yawi Nusyado myam kam na ra imnai mnggarm anya
ikofen wer bo dobe: "Ras bedya rya ma baim fa waksun ro dine, rarirya
na kwaber wer be sup sasor. Ro insanja mam kwar ani koreri irya. Wun u
makbak erobaido bom bani ma rwa mu ra wabur." Yawi Nusyado dun u
makbak byanya ba bo ibur monda snar ikak beba ya isya byarek warek
i. Yawi Nusyado ibur kuker swaruser u bera mu ra ker be koreri myam
kwar ro abyab ani. Ro fyor no Yawi Nusyado kyain ker ro manggundi ma
swaruser byena nawayan kam be koreri, koreri befo kuker marafrif baras
raryab bemnai ba. Fyoro-fyoro mura Yawi Nusyado myam faduru baken
byedya ba isof darmaker. Yawi Nusyado baken byedya ifo armaker isof u
kawasa bero mnu Sopen i sya kame beba ma kasun s-or i be Mansar
Mananarmak'rdi. Mansar Mananarmak'rdi ibur mnu Sopen Ro ras oso
mananwir bero mnu Sopen romawa snon kabor byedya dun maryai ma ikoi
byesya bo imbran farma ro swan andir ya. Fyoro ba myam rarpon manswar
ya isar kir be yen andir ma imbran be bosen ya bo iwanda, romawa snon
kabor anya dores byair fais u manswar anya ro ibe ifur i. Manswar anya
rya nda imbran syewar kyon ya ramnai kyain ro kyon anya dori. Manswar
anya kyain fyoro mnggun ramnai dores ma imbran be yen andir besyor
iwande. Ryande ro mob esyor ya kyikr baken byedya ma in kasun mawa
bero bur byesya sisapi ro yen ya bori. Fyoro ba bin kabor mnggun u
bepyum ya dores kir ro aibur mawa bero yen andir sya ra kyain israi in
mawa ansya ro ma iser si ro inawen ya ramnai dek raryas kyain ro
manswar anya dokor i ma susun kir be sup ya dori. Romawa snon kabor
anya sneri ryo in kabor bepyum manswar ya byanya mura ibur pdef be mnu
ra isan wos be snon bebor bero mnu ya dori, imfa meser ya sisasyar kam
fa ssai warek ma sfor manswar ya kuker u inai in kabor mnggun u bepyum
kaku myam ani. Meser anya fyas e snon bebor bero mnu Sopen i sya
sisasyar fa ssewar manswar ya ma inai bin kabor mnggun anya ro sup ya
dori. Se kayam bo ssai warek imfama ono sipok fa sfor su ba. Rarirya
bo se sewar ker snar mananwir ya romawa snon kabor byedya ikofen kwar
bo dobe oso fyor manswar ya ma inai bin kabor mnggun bepyum ya fa byuk
i ido nari nya srar mnggun byedi (erobaido mananwir ya inai kasun
barsa byedi). Mananarmak'rdi ryower u sasewar ine mura imarisen
daksewar pyan. Fama kawasa bero mnu ya sikofen i bo sobe: "Siwara ma
snon bepduke besambrab ya derer bape sefama sipok ba, insape robar u
ebe mansar bo ekriwk ba au ya auso na befor u manswar iwara au ya?"
Mansar Mananarmak'rdi ryower monda wos sanna bo imbran user u snon
bebe na besun be sup ya dori si, ma Mansar Mananarmak'rdi ima imbran
be kor andir ya ma kyain yofek ro kris knam ya fuar i. Fyoro ba ryower
mbrus beba ya ryok ro sup ya dori. Snon ansya ssai warek manswar anya
su kwar fama, manswar anya ifrar kir u ai warek anna ma ifrar ra kor
andir iwara, ma ifrar sasar ra mob Mananarmak'rdi dof ro i, mura
Mananarmak'rdi dores fasau ra byuk ainkyon byedya syawer manswar anya
wemin byesui isof isapi, ro diya Mananarmak'rdi fyor inai bin kabor
mnggun ani. Mura manswar anya dun kawasa byesya bo sibur be sup Yapen,
befnai babo ine manswar ono sakro sup Biaki ba. Mansar Mananarmak'rdi
dun u inai bin kabor mnggun u manswar ya byani ma ryir i faro mananwir
ya romawa snon kabor byanya, fa byuk i. Ro bemnis ba faro
Mananarmak'rdi isoine mananwir ya romawa snon kabor byani bye ra wos
ikofen kwar anya ba, boi randip ri byuk be Mansar Mananarmak'rdi mura
Mananarmak'rdi bye randip anya fa keret ma kawasa byesya smun i ma
sikun i insama skan kam e. Mansar Mananarmak'rdi kawasa byansya sra
sun u aimun e, robean ma bakdi ram ro yaf byani. Smun randip ani ma
sbarapen i kuker u robeyan ma wei bebor sun kwar ro mansar
Mananarmak'rdi yaf byani. Apen anya myas ido kawasa ansya san pres u
robeyan, wei ma randip ker sya fa sibro bur u Mansar
Mananarmak'rdi. Ro diya Mansar Mananarmak'rdi imsor kawasa byansi ma
ryir ibur mnu Sopen mnu iswar, fama kawasa byesya se syowi i
ba. Mansar Mananarmak'rdi marandan byedi erobaido Mananarmak'rdi
barbur byedi. Mansar Mananarmak'rdi iswar kaku mnu byedi, Sopen, mnu
iba ro, ma bo saneraro byedi mob damom ro ma mob i-wan randip ya fa
ikofen u wos u "Yamnai" mura manggundi dor u bo anya be
Yamnaibori. Iswar u kawasa byesi kako fama armaker byesya sifnai fa
manggundi kawasa byena sikofen i ma se syowi i ba. Kawasa byesya
sakfawi saswar ba, snar u san rokaker bebor byena ma randip
byedi. Mansar Mananarmak'rdi nya roi no bese ba kwar, roi bedawer ya
iso ainkyon byedya ma wai kabasya mnggun u yas bedawer kwar ya suirya
kwar. Ro fyor u rya ryas kyain ro manggundi ro Yamnaibori ma swaruser
byena nawayan kam be koreri myam kwar anya, ibur fasau ba bo kawasa
byesya san u apen ya besiper bur i, imewer dawos kuker u robeyan ma
randip u dakan ba na boi isu monda wai kabasya byani. Dun monda
kabores, kanarem ma ainkyon byedi bo byores isye andir iwara be mun u
oridek e. Ro fyor ya wambraw ya iso mura soren ya imarmer boken isof u
Mansar Mananarmak'rdi kyara fa byores pdef ba bo bye ryar ro mnu
Maundori. Ro fyor ya bosen ya syo ra kyur ramen i ma sau o ba. Mansar
Mananarmak'rdi byuk u ainkyon byanya isrib uk u bosen anya fa mob ya
byesau ma byores munde ro. Ro bosen ya bande ri byuk u ainkyon ya
ifrur rwaren erobaido wir ya fa ipyar ro. Snar ro fafisu ya Mansar
Mananarmak'rdi imbrowe ma war no napyan ba mura byuk ainkyon byani
ifrur u war ya fa isasyar ro karui bero yen andir na. War anya
byeduber fa kawasa bebor mnu Maundori sna be war e ma isya sor kaker i
be "war Mananarmak'rdi". Marandan bera be Mokmeri ma Meokbundi
(erobaido Meos Wundi) Ro fyor wam ya ryir e Mansar Mananarmak'rdi dek
ro wai kabasya mnggun byani ma isye andir iwara be Samberi. Fyanam be
Samberi ido Mansar Mananarmak'rdi daron fa myun inmamen beba ya kuker
u ainkyon benik byani. Ibyaun u inmamen anya ro wai kabasyai mnggun
ani ma byores be rum manibob byedi ro mnu Samberi. Skok u inmamen anya
ramnai sikun i ra myas e san pres i bo bin bena rum ya dakan ker o
ba. Ro fyor Mansar Mananarmak'rdi ifawi bin ya dakan inmamen ker o ba
mura imai bo ibur mnu Samberi, byores be mnu Mokmeri. Ro mnu Sorido
banda ri Mansar Mananarmak'rdi byuk u ainkyon benik byanya myun in
beba ya wer fa dun bo ibur snar napirman byedi Padawankan ro
Mokmeri. Ro mnu Mokmeri Mansar Mananarmak'rdi iryab snar isrow ma
fyafyar us u napirman byedi Padawankan, fyoro kwar susrow su ba. Ro
fyor anya Padawankan swar ryande rya bar ro sup bo ibur baim e, ro
diya sikun in Mansar Mananarmak'rdi myun ro Sorido anya fa san pres i
bo Padawankan swar u dakna ker o ba. Ro mun mandira ya Padawankan swar
u ibur ker sup ma myam faro inkor sya mura ifuken ker byesi ma sobe in
sya sibro, mura imsor bo dawos nabor e. Mansar Mananarmak'rdi ryower
Padawankan swar u dawos mura imai wer bo dor fa ibe ibur. Ro fyor u
ibur baim e napirman byedi Padawankan byuk u srai emas bon ri suru ma
oser ma byesur kwar. Mansar Mananarmak'rdi byores ibur mnu Mokmeri ma
ibur yob u Meokbundi mob ikyar na ismai Koreri ro ras
oso. Mananarmak'rdi ifyafer kuker u payamyum ro Meokbundi ma kawasa
bero myos ya se ababen i bo siyau i ba. Ro Meokbundi Mansar
Mananarmak'rdi imarisen kaku ibe isuf swan srai mura dor u srai knam
oso ro kawasa bero mnu Sokani fama, simewer sbuk srai oso fa isuf
ri. Ro diya Mansar Mananarmak'rdi kyer srai sur byani ma isur fasau
kaku fa bye srai knam beba ma isuf i be swan srai. Randak ya ro diya
Mansar Mananarmak'rdi ras-ras na kaem ikenem monda ro safsuf swan
srai, fararur bye naba ba kaku. Fararur bero Meokbundi (erobaido Meos
Wundi). Ro arwo oso Mananarmak'rdi iwudar ra myam u srai por byani,
fama ikandor kaku snar myam fa am'n besau ri fyak byansya se bei, oso
isya dinem karau swan srai byansi. Snar u arwo-arwo na kam swan sya
sibro ker mura Mananarmak'rdi fyafayaf bo kyara fa ibe isin warek u
mankaraurau beyinem u swan srai byansya fa insama fyor i. Ro rob
randak ya Mananarmak'rdi kyon isin ro srai fuar i. Bape myam ro arwo
ya swan srai byansya skarau si kaker. Ro rob ebe suru ya
Mananarmak'rdi ijabek u kaderen ya ro srai knam ya fadu ri fa byuksin
u mankaraurau ya. Bape ro arwo ya myam wer swan srai sya sibro wer. Ro
rob u ebe kyor Mananarmak'rdi kyain yofek ro srai kadwor ya ro kapyaf
swaf na. Meser muryas ya ro fyor u dorek nakpef baim e Mananarmak'rdi
myam mankaraurau swan srai anya dado murbab ro srai kadwor
i. Mankaraurau anya Makmeser i robaido Sampari iri. Ro diya
Mananarmak'rdi isawar ra iser epen ma fyor ra idworem kaku isof
Sampari ispup sewar fama ipok fa pyupes bur u Mananarmak'rdi bramin
byena ba. Dorek anna naiswaryas nakpef kwar ro diya Sampari ibor
wawork bo dobe, "Sye Mansar e, yor fa pir aya snar ro fafor ayena
naiswaryas u nasbak kwar". Fama Mananarmak'rdi dobe: "Na yapir au ba
isof buk u ro yamander ker ro ras suine faro aya." Sampari ifuken
Mananarmak'rdi rosai imarisen kaku ya, bo dap pres u ro u dobe kyara
na Mananarmak'rdi da imarisen na, bape Mananarmak'rdi kyarem oso
ba. Mura Sampari ifuken kaku wer bo dobe: "Imbo rosai so wamarisen bo
mander kaku ya ido wakofen." Mananarmak'rdi ikofen myaren bo dobe: "Ro
yamarisen fa yobe buk be aya ya isoine, koreri syeben." Sampari ikofen
bo dobe: "Mananarmak'rdi aror bani yabuk i faro au kwar ro arwo ine ro
fyor or ya dompis baim e." "Nwa koreri syeben i kwar fa isya ryo
rwori, fama nari insama wafawi babe naknik koreri syeben ya byedya,
meser iyama mam fa Insoraki mananwir beba Rumbarak u inai byedi
imasasi kukr u inai sya ro yendisare fanam u mars knam ya ido faku ra
pauk u mars bon no fa swo munda yob si." "Nari mam rosai bekur u
Insoraki ro ras barpur nayama, irya samambrab koreri syeben waksmai
kwar ro aya." "Yor fa pir aya ba sonai meser ya dek kwar, aski nabor
be au." Mananarmak'rdi insape pyir Sampari fa ibur kaber snar u ismai
ro myander ker anya kwar. Ras ri beso skawas e Mananarmak'rdi myam
randa inai sya simasasi ro yendisare ya ro fanam mars knam besob munda
i. Mananarmak'rdi fyaku ra dof ro mars baken ya barpur ya, ma myam
farfir kaku inai bemam pduk kaku isoine Insoraki sikafkofn ker ro mnu
ya dori ani. Mananarmak'rdi pyauk mars bon anna ramnai ikofen wos na
ramnai syo na be masen iwanda. Mars bon anna nararyor so masen ya ra
iya ryandum ikob ro Insoraki sus byesi. Insoraki ikandor bo duf u mars
bon anya syo i bur be bandi. Fyoro ba ido ebe suru ya ryandum ikob wer
ro Insoraki sus byansi. Duf mars bon anya ma syo i binkwan kaku be
bondi. Bape mars bon ebe kyor ya ryandum ikob kaku wer ro Insoraki sus
byesi. Insoraki ibur ra ro rum sus byesya simaker mura isnau si ra
fyoro ba byabir binggundi imobes ba. Insoraki sinan byesya sikandor u
ro befnai fa inai skobedya imobes ba i, skofuken sewar ro kawasa bero
Meokbundi mansei befawi ro befnai kaku ya fama oso ifawi ba. Insoraki
binggundi ifawi ba kako. Fyoro ba paik byena namnis ma nya romawa ya
ma romawa snon rirya, bo skonir i kuker snonsnon Manarbew. Manarbew
isur fasau ma iba pduk kaku ra fyafir ma ifawi dawos e, ro diya
ras-ras ifuken ker u snari Insoraki bo dobe: "Wawi yai iso, wawi yai
iso?" Insoraki sinan byesya sfafayaf mura ras oser skankain kakara fa
sna wos fa sifrur wor beba oso ma ro wor ani ssewar u Manarbew kma
byedi. Ras anya rya ma wor anya imbran bo kawasa bero mnu na kam e
sfanjur fa sakso wor i. Insoraki ma romawa byedi Manarbew sukain ro
barpon kaku fa sumam u snon bewor ma bekin sireb ma insama Manarbew
myam babir u kma byedi. Randak ya bembran bepon kaku sisoine romawa
snon kabor u babo sya, fama Manarbew myam faro kmari ba. Maran ebe
suru ya ido snon fadu sya fama Manarbew myam babir u kmari baim. Ra
imnai ido maran mansar mnggun sya sakmbran wer fama Manarbew bye ra
mob o ba kaem. Mura maran epups kaku ya ido mun mansar kraf kaku si,
ma Mananarmak'rdi i bepur kaku, duf ainkyon ma airam na fa byukbabur u
wark u ran sya. Ro fyor u mansar ansya simbran ro Insoraki ma Manarbew
barpon subedi Manarbew kyur mura be Mananarmak'rdi bo dobe: "Wawi, yai
iso iwu, wawi, yai iso iwu." Manarbew ikofen bo ispup fa ibe rya fyor
kmari, fama snari Insoraki iser epen i snar dain kaku
Mananarmak'rdi. Manarbew ispup rao snar ryir brasi ma ifrar ra fyor
Mananarmak'rdi. Ro diya wor beba anya sibur besisye, simsor snar
Mananarmak'rdi byuk u Insoraki bin bepyum kaku ro myos iwa. Simkok rum
na ma sfaryan ro bebor sena kam ro wai beba sena, simer pef u wai mawa
na kaem snar u simewr Mananarmak'rdi swar u skobors na ri. Kawasa ya
kaem sayun sibur be Meokbundi sibur Meokbundi ma srande sna ro
Yobi. Insoraki, Manarbew i ma Mananarmak'rdi skobe skakek ro wai sena
fama skur pampum sko. Insoraki srar kasun byedi, Saneraro, iswar sko
mura dado fa kyain us sko ro Meokbundi. Ro mun mandira ya Manarbew
ibiser mura dor robean faro snar Insoraki, snar Insoraki iwan bo dobe:
"Rwa wan kmam babara byansi wa." Manarbew rya dor robean ro kmar
Mananarmak'rdi mura kmar Mananarmak'rdi iwan i fa syun randum myam ro
sim ma myam robean bebor naisya kaem. Manarbew ikofen badir faro snar
Insoraki ma Insoraki syun randum myam ma ikandor bo ikram fais ro
sneri. Ras-ras robean na nrarirya kwar bo skan monda. Ro ras oso
Mananarmak'rdi rya ikun manggundi ro kabui knam ya ro myos ya mun u
benir be Kaweri. Ro mun mandira ya Mananarmak'rdi imbran ibur be rum,
Manarbew myam i ro swaf u ebinkwan ma ikofen yob snar Insoraki: "Wawi,
wakmam! Yai iso iwama." Insoraki ikyar ba bo dobe: "Bardai awer ba
kmam ima byabara bo darmaker. Ibur ra ro rum insape Insoraki ifawi
kaku Mananarmak'rdi fyadwer kif bekwar byedya kukr u kif bebabo ma
myam be romawa snon kabor kraf bepduk e. Manarbew ikofen faro snari
Insoraki bo dobe: "Wawe, yai ima inik kaku fa ifrur ro nayafa kaem,
ikofen monda bo aibon ma robean naisya kaem. Komam kam kada fyadwer
manggundi kwar fa byabo ma i ero fandu kobedine." Randak ya Insoraki
ikyar manggun ro Manarbew ikofen na ba, bape fyoro mura sneri ikyar
e. Mura ro ras ya mindi Insoraki imsor swari, Mananarmak'rdi, bo dobe:
"Rosai befnai fa wakofen badir manggun au ro randak ya ba insama
kawasa ayesiwara sibur awer ko." Fama Mananarmak'rdi dobe; "Wamsor
awer aya ba nari koyau user si.” Meser ya Mananarmak'rdi ryanda dores
ro yen andir ma isik wai Mansusu ya ro yen ya bori. Ryos pum wai isik
anya ra ryanda ipyar ro masen ya, fama myam Mansusu ya ma dun sneri
ba. Isik Wairon ya ma ryos pum i wer fama imewer i snar kawasa sibor
sifrur i kwar rya imewr i. Ro diya isik u wai Karures beba ya wer,
ryos pum i randa ipyar ma i Mananarmak'rdi myam ma imarisen ya. Ro
diya skobyawn ro bebor skobena ma skayun skobur Meokbundi be Krawi fa
skomam kawasa skobansi. Ro Krawi be Numfori. Mananarmak'rdi, Insoraki,
Manarbew ma me byedi Saneraro skayun kuker u Karures ani ma fasau
monda skofyafer ro Krawi. Kawasa Meokbundi bebur ansi sisya kam ro
diya. Mananarmak'rdi ikofen munde yob u mambanyo ma inbanyo byesuya
insama suranda subarek ma sisu wai Karures anya ro subons na. Insar
mansar ansuya sumewer kaku, sukofn mamyai Mananarmak'rdi, suyobe ima
da ro kaku yo iryandari dobe wai byedya fyak baken subena be afyak
ri. Kawasa ya sisan pum Mananarmak'rdi ma imsor si bo dayun ibur be
Numfori. Sobe sifawi kada nari siso pyum u wos byena, ma rarirya nari
sakfadwer kraf ma kif bekwar sena fa sbabo ra mob u byabo ra
i. Mambanyo ma imbanyo ansuya ras ri subarek ma karures ya iruren epen
su kada na sufadwer baken subena fa subabo kako sumnis Mananarmak'rdi
manggundi. Wai Karures anya dayun be bar ori syun ma ifyafer ro myos
Numfori. Manarbew kyans ibe ifnak ro yen e snar dares ya isam
boken. Ro diya Mananarmak'rdi syo karui ya rande bye myos fa nyir be
Poiru. Manarbew dado rande ifnak ro yen bero myos Mnggun ani. Myos
Poiru isof babo ine komam kada isya ro mnu Pakreki banda ri. Ro myos
anya bori Mananarmak'rdi kyer ai knam ri fyak, ma ai knam ri fyak
anskoya skobe keret beba ri fyak, skoiso: Rumberpon, Rumansara,
Anggraidifu, Rumberpur. Ebe bukor ro keret ri fyak anskoine isoine
"Funkawyan". Barbur bera be sup Korano Fyak ma mun u ori
syun. Mananarmak'rdi skobarek fyor ker mnggun ro
Numfori. Mananarmak'rdi ikofn yob u kawasa sya bo dobe: "Nari yafrur u
roi bebor roi befrur kandor ro myos ine imfama yor fa mgoso pyum ro
yakofn na. Oso imar ido mgokans awer i snar nari ikbawes wer fa
ikenem. Robean na nabro ido mgosewar awer be sup Yapen i snar nari
robean supsap nra muma ro manggun na." Kawasa Numfori siso pyum
Mananarmak'rdi wos byena ba, skans snonkaku emar sya ma ssewar robean
ker be sup Yapen. Mananarmak'rdi imsor kawasa beso asuser ba sya ma
isu wai byani fa ibe dayun ibur pdef. Ro fyor skofasasos fa skobe
skayun ya Manarbew isya ifnak kaker ro yen ya bo. Mananarmak'rdi ryop
u ikak beyarek sayaryur sya fa sfakak Manarbew i, mura Manarbew imgak
bo ryanda dek ro wai. Randak ya ro diya ikak u beyarek sayaryur sya
sro Numfori isof babo ine. Mananarmak'rdi skayun skobur be myos Korano
fyak nawandi, ro diya skayun skobur pdef be mun ori syun iwara ra
skofyafer ro sup amber nairi wa. I befnai amber sya snana bo koma kona
roi no ba. Mananarmak'rdi anggangginem byena. Rari fafyar ya mob u rya
ya, Mananarmak'rdi nari kyaber wer ro syos bebe fik ya. Mananarmak'rdi
ryir u angginem byena fa mob nrok ra ya isoine: Beponi: Kawasa sya
sipok san awer u bakdi bon ma randip snar u su bebe knam
Mananarmak'rdi ibur mnu Sopen. Bebesuru ya ido, kawasa sya sipok fa
san awer u ikak ma kawen snar si kako sakrer ra mob Mananarmak'rdi
ryer ra i. Bebekyor, ono sipok fa sisbawr awer u rik e, snar u ro mob
u rik nasbawr ro babe ababen no ba. Bebefyak ya, nari sbaus u rum no
fa naser u snonkaku bemar ekbaws wer. Beberim, sbaus u rum-rum beba no
fa naser u robean Mananarmak'rdi byena. Bebewonem ya, nari sfanjur
aimun no fa nabore snar u ro fyor Mananarmak'rdi rya muma na sup ya
pyampan ras ri o kyor. Rarirya fafyar anine imnai roro dine.