Ro fandu mnu bero swan andir ro myos Byaki bar wamurem na mnu ri suru
sufanam yaye. Mnu Saba ma Warwer. Ro fandu keret bekenem ro mnu suine
na iya snori keret Yomga. Insar bero keret inenya ikenem kukru kpu
byeskoya skobe kyor. Inai bin oser ma romawa snon ri suru. Imbesrar
anskoine kpu skobanine iso befaduru sko ro skoba ba ya ra isof
skobai. Snar sinan skobesuya sumar fyoro kwar. Insar kpu skobanine
i-swar sko ma imor byekandera pdef sko ro kankenem skobena. Ras ras
ryande dun robean ro yaf byedya fa byuk i fyan kpu b-y-anskoine. Nyan
bero mnu erande ro yaf fa rya munde munda ro ya snori Serbiser. Swaf
bero mnu be yaf ya ikwan kaku. Infama insar ine imbran ker roi ro ras
ras nja dobe ikwan ba. Imbekpu ansuine ma kawasa kam bembran ro nyan
Serbiser sya sifawi ikak korben efair si ro nyan ine munda munde ya
ba. Ikak korben ine sneri ryo insar ya kpu bye Yomgai. Inja byarek
kyara nyan ri sai so nari byuk i srou i besyani. Ras ya ido imbekpu
ansuine sumbran wer ro nyan Serbiser be yaf skobanya fa sube suyun
robeyan mboi sufawi ikak korben anya byarek fyair su ro nyan andir
anine nja ba. Korben ine byesausau fa isrou kukru Yomgai. Inja kyara
ker nyan ri sai so nari byuk i syewar i be rum. Fafisu ine imaws be
aya fa yakbeuser u marisen ayedi. Rarirya korben anya dek fa pyark
baken byedya ro aiknam beyores ro nyan andir efanam bam bamu seke ma
sado ro i imbo insape iwaf imbekpu ansui. Iwaf su ro arwo ya ra isof
mandira. Inja era be yaf sya kame sfasos fa sibur be swan be rum anenf
sena oser-oser. Nyan Serbiser byeuser ba. Aiwan bebor bero nyan ya ban
bar sya sefasis kame ma siwaf kam fa sibe sfair roi na knik befarar be
ro mob yani. Ro fyor anya Yomga kpuri insape su-y-ak-kaber ma sube
sufanam mob korben anya iwaf su ro ani. Fyoro ba ido surama ro bambam
anya nja Yomga dores bo myam pum insar kpuri fa dado bepon snar bambam
ine syamswene. Fafisu ine ipyan korben ya fa byeuser u baroser roba
ido marisen byedi. Ikyui ro ai ipyar bakn byanya roya rarbab isyui ma
dakakas ro inoken faru in Yomga byani. Inai inkbor anine myam kero
kpuri nja ifawi roi besun ro inoken b-y-anine ya ba. Dakado ro bam ya
rarbab ro sop ya ido insape imbran duser kpuri ro barpur. Fyoro ba ido
surama ro mob simasasi ro ya nja sumnai su fa sube suyakmasi snar mob
ine ryo nyan andiri. Mob simasasi ro ine fyanam be rum ya nja sramra
ido simnai fa simasi ramnai insape sisar be mnu ya munda. Imbekpu
ansuya suyakmasi ra sumnai bo fyor sube sumbran ya ido insar anya myam
ikak eba ya dakas ro kpu inoken faru byani. Ro diya sumgak bo sufrar
subur inoken ani. Ro fyor sufrar subur anya surower u ikak anya dor su
ro subrusna. Sumor ja sufrar pdef ba imboi sumnai fa sufuken u ikak
ebesya ni. Sukmu ikak ebesyanja sukaber ra sube susewar fa sufawi
rosai iso ibe byefandun kaku ro su ni. Ro diya ikak korben anya dawos
yob su bo dobe, 'Ne bin muiya ne mumgak awer aya bo muyun aya fa yaso
mu be rum. Mboi nari muyofek aya ro sime. Insar anya kpu surower wos
ikak anya byena mura ido sumam yaye sumkasna ramnai sube snewar oser
fa suyuni. Inja suyuni kukro inoken anya bo subur. Suranda ro rum ido
suyofek i ro inai inkboru Yomga sim byani. Rob na ido mutiara robaido
faduman byedya idameser ro Yomga sim byedi. Roi ebesya anya srar
b-y-ansuya sumam i kwar. Mboi sumgak sufuken i ro imbekpu ansuya
ndi. Insar ya ma kpu byanya Yomga sukenem so ikak korben anya kukru
kankunes nja inkbor Yomga derer ifawi robeboru efarar bero kenem
skobedya ni. Rob na ido ikak korben anine fyarwe baken byedya fa bye
snonggaku ma denef us inkbor anya ro yar anenf byedi. Rarirya fafisu
ine imaws be korben ya fa byuk beuser u farbuk sube byarek kyara ker
do ras naiyafa nani. Ras paik ma tahun na nfararwer. Nja inai inkbor
anya n-o fyadores erobaido imobsba ma bine srar b-y-ansuya sufawi
kwar. Inja sufuken i bo suyobe mansei befur fa rwa dine ni. Srar
subanya dobe roma babo ero mnu inensya ma eso rya ma ro aya ba. Mboi
ikak korbeno ebarek us aya ro sim anenf ayanya iso ebe mob ine fa rya
dine ni. Srar b-y-ansuya sukyar i ba. Inja byas u kedwa sim byanya fa
insape manggunsu sumamu korben ani. Ma ro fyor anya sukandor kaku. Mob
ine srar subanya ma ikak korbenya sufrur i fyoro kwar. Mboi
mambekanaek ansuine sufawi barya sumsor naba kaku. Suyayin o srar
subanya bo subur i. Mambekanaek ansuya sumgak kawasa ero mnu
ansinensya s-ak fawi mob anya fa skomai rirya sube snewar oser fa sube
sumunu ikaku korben anine. Ras ya ido susasyar fa suyobe suranda sura
swan. Suyaron yar karui bero mnu ya bandari na. Bape susmai in mgun
esero baberi. Subur kukru raryab ero susnesna ba rande ro rum ido
korben anya ifuken su bo dobe: "Sasewar mu be ro rasinenya ryarso?"
Suyobe: "Nusmai in mgun esero baberi snar nusambrab fa nuyaron be swan
ya dori ba." "Ma nusmai royo fa nubuk i myun u insya ba. Korben anya
dobe rarirya ido mufasos airares erobaido adwar rars no snar naiso
kobuk i myun in bero karu na bab nansi. Sumnaf nyan korben ya ikofen
be su na nja. Suryab naba kaku ma sumbran beri be sup fa susewar adwar
rars ikak ya ikofen be su na. Fyoro ba ido susasyar ro sup kukru adwar
rars na bos ri fyak. Rarirya suyun na be rum ma surir na faro korben
ani. Meser di korben anya ma mambekanaek ansuya skosasyar fa skobuk
adwar na nsewar in e. Skoranda skomnai ro mob u skob e na insya sibor
do ya ido karui bero diyanya snori Inggo. Skopyar ro dine ma skobuk
adwar na eninyan in in bero karui ine bab di nsi. Fyoro ba ido in sya
sisasyar ro karui ya bab di boi sibe simar nja sibur sambrab ba. Inja
mambekanaek ansuya suryab bo suyas suryur si. Korben ya byuk purai
byedya fyarepen way skobanine. Daron byeninyan in sya kaker kukru
adwar anna boi ifawi ro na kero efur i nya ba. Mambekanaek ansuya
suyas suryur in sya boi sukara fa sube sumun korben anine nja. Suyek
ro way ya bori fa swaf ker ine subuk i byeuser u swaruser ebyeba
subani. Ro diya romawa eba anya duf sumber b-y-anya ma byuk i wapuk
korben anya fa bye mnuk ri war. Kur ine korben anya ima imar
beri. Mnuk ri war anskoya skosnos naisine. Karui Saram, Sawaki,
Kaduki, ivengger, Womensimbrir, Amawi, Mansasyo. Sumamun ra sumnai
subur kukru way ya be rum imboi korbenya bakn byanya ma subur i ro mob
sumun i ro i. Subur ra ro rum ido sufafyar roi sufur na kam be insar
kpu subanya ma korben anya swari. Yomga kpuri sumnaf fararur ebyeba
anine mura sumsor bo subur be sup ya dori rande sube ras ri fumo. Ro
diya subur kaber be swan erobaido rum insama sukram ikak ya baken bye
ero mnuk mnuk ansi. Suranda suryur u korben anya mnuk b-y-ansya ma
insape sube si fa sbarek pampam ro bar Wambarek be bar Wamurem ro
barpon mnu Saba ma mnu Warwer. Fyoro ba ido korben ya mnuk b-y-ansya
sfadwer be karui fa si isof babo ine bebemyos bo ekain pampam
ansirai. Mamun anya imnai ido Yomga paik byena namnis fa ikapar. Inja
ikapar ikak mgun ri samfur. Yomga byekabom. Inja tahun di beso nawas
ido snon bero keret Fainan rya ma dor fa dakbuk i. Bo keret bin ya
b-y-ansya simarisen nja subuk su. Farbakbuk bepyum anine imbran kawan
ba. Snar ro fafisu snon ya byeoser kukru bin ya ido sararyur bero bin
ya syun ro baken byedya muraido imar. Marmar ine byewar bar bin ya ma
bar snon ya smun yaye si. Ro fyor skara sewar ro ebyewar u marmar ya
ido insar kpu anya iso e-be aryawin kukro undam no fa insape ikak mgun
ya syae i. Ikak mgun ri samfur u Yomga ikapar anskoya iya iri. Mob ine
iso insape imkok farbuk kankunes korbenya kukru inkbor Yomga subanya
fa sfaryas i ro mnu ya ma isyer fafyar ro snonggaku sya kame. Keret
Yomga si-mai nja sesnewar oser bo spai way sena bo skabor soren ya be
bar wambarek ra skain ro Sorong raja Ampat. Fanam war mgun ya nja snir
war ine be Yomga. Isof ro dine fafyar inkbor Yomga ma ikak korben ro
mnu Saba Warwer.