Inja yafawar fawar bebesuru ya wer. Snonsnon ayediso Demianus
Baransano. Yabeumur tahun samfur ri fik seser di wonem boi yarandak
fawar bebesuru ine wer ma be o romawa ye befarkor ro Amerika iwa. Ro
sup bondi iwa yafarem farfyar ine be i. Fawar ine rya dine. Myos Byaki
randak kaku iwamyase bye keret oser. Keret byedi iso Rumbyak Rumu rum
mgun sifur royo Msirn bo ya rum ine kawasa sya sibor siryur ro i. Inja
ras ya ido binsar ya snori iso Inggumiboi. Inai byeskoya iya snori
Binwani, iya snori Inandei, iya snori Inggumi kako. Inai skoine skona
snono ba. Imboi roma snonkbor skoya Manwomri rokir byeskoi Manwomri
swari Insamsonai su rokir subeskoi skobeyo kyor. Anenfi, Kumeseri,
Andobai. Roma skoine skosam rao skosrouo randipi. Robarya skun i ma
skobe skokun i boi foro ma skokikun i ba. Roba rye roma beba ine
Andoba iwano bedar byesu iya benir be Anenfi Dobo, "rwa fa mamo binsar
aniwa Inggumi ina bye ansiwa sikaben apyamo ido wun kero ma kokikun
randip anine bo insape na kero mura be sko!" Inja Anenf rya imbran ro
binsar anya Inggumi rum byani bori. Barya Inggumi ikofen inai
byanskoya bo dobo, "Binwano mampano besyosyo iyas ya fa!" Mura ido
Binwani susae randi sumame. Sumam ido romawa ani dado mumfes. Inja
surandum sukofen be snari binsar Inggumi bo suyobo, "Awine, snon
diri". Insar ani dobo, "Mukofen bo syun mumrum!" Syun randum kyainus
su ra mnai Insar Inggumi ifuken i bo dobe, "Sariso wun kaku ro
dineni?" Romawa ani dobo, "Insare inkuno randip ya ma iswa boi foro ma
nkokikun i ba raryo yun anumker ine ma yobo yakyukn ma yun ra nkokkun
randip iwa". Do binsar ani ikofen i bo dobe, "Indo be fa wakyuk ro
wepambok si!". Barya bye anumker anya fa ikyukn ro wepamboksi rao
ipauw rao isak mura ido dun bo iswa ra. Rya skokun ben anya ido insar
ani iwan ina bye anskoine ma skuser. Skuser bo ikofen bo dobe, "Mgora
mgomampano romawa skoiwa!". skobe, "Yo!" Do inai anskoi skora skomame
romawa anskoya skobe kyor, inai anskoi skobe kyor. Mura ido skokaber
ma skobo, "Insare snon skoiwa skobe kyor." Insar ani Inggumi dobo,
"Besya ido mgosrouw sko!" "Mgobe kyor, skobe kyor ja na mgobuk sko!"
Inja Anenf dun ben ker anya bo kyaber ra, dun ra roro binsar ani
Inggumi inai bye an srori. Ma binsar ani dobo, "Nari mgona ina ye
skoine!" "Boi mgora muma roba ido koro nyande ine kame!" Romawa
anskoya skobe, "Na ngoro diwa." Mboi ina anskoine na skora ido, bai
ina anskoi rasya ido romawa anskoya skobe skora skosam. Andobai,
Anenfi, Kumesersko. Skofrar makei skoban sya. Boi ina anskoine skora
fa skek ra ryas u skokon royo roma anskoi mob skenef ro ya ido ina ya
bepyum sui bembrai suya ido sumewer sukon ro yaro bemakekm ya kukro
snon beyenef ro i ya snono bepyum be skonya iri. Snon bembrai ya irya
boi rob ido idar nja. Syayan warwark rya sayan byedi nsun do yar ya
rao myandumek. Boi beba ansuine me baken subena nasyor je mob suyenef
ro na nasyor. Inja inai manggun ansui sukara bo suyobo da snon manggun
ya da beyenef ro snon manggun sui beyenef ro yarya ansui. Inja
suwarpon yaro besnai ma besyor ansui. Mboi bine bin bebabar anine rya
fa kyon us o kyon do yaro snon manggun ani Anenf bye di. Roma anskoya
skosun mrum, inai anskoya skokon skomame. Mura ido Inandei, Inggumiboi
sukofen bo suyobo, "O mbo Binwan au ma nwapes ba bo". "Snon manggun ya
i buk yani." Do Binwan dobe, "Mboi insandi mumewer mukon do yar ine ni
kukro muyobo myandumek ri." Inja mambekanaek anskoine skobuk inai
anskoine ma skokaparo myos Byak ine. Ma myos Byak ine snonggakuyo
skokapar do i sya randak ya keret ya iso Rumbyak. Keret ine ryo yu
Manuren iwa Msirn bo i. Ma roba boi sibarbor ma ssae be swan ma smam
randako pimami. Mura ido sano pimam anya ma simaker be sisye. Inja sro
bur rum anya rao awak sya semer. Indo awak ansi beyenef ro rum
y-an-si. Inja sor i be Rumawak. Do siya wer ma simaker ja sor si beyo
Makmaker. Bedawer sine sibur be sisye. Sibur ma insape bebur da
bebarek royo beyom mob bebe masnmasen na ma befur rum ro nansya ido
sker be kereto Masnandifu. Bebur da eberyar ro masosn ya fuar di sya
sker beyo Masosendifu. Do bebur pdef mura sya sibur ra sker be Wanma
ri. Ngukro bekerbe Wanma ine ido kyurpum o pimam i. Ikofeno bebema
be-y-obo dakan ya bo dobo, "W-an ma!" Roba rariso ibur da kyer be
Wanma ri. Inja ebe Makmaker sine ban sibur sker be Makere. Siya sibur
fa roi no ma san ba mura ido san kandarek. Sor si be Andarek fa sispur
i. Inja fawar ine iswara kaker mboi mob rya m pon imnai ro ya irya Ma
insape insama ido Byak koine kokfawiyo kokame ko ro iso mob oser. Ko
ro i mob oser boi barburo kobur be sisye ine, pimam ine byebeyan ma
sinan sine simaker ja iso kobur be sisye mano korama insape kokar be
sisye keret nane fa ni. Inja fawar ine mob ryampon mpon imnai ro iri.